Dane Paulus ring Pulo Malta
28
Sasampune slamet rauh ring pasisir segarane,
wawu tiang sami uning pulone punika mawasta pulo Malta.
2 Manah wargane irika becik pisan kapining tiang sami.
Ipun sami ngendihang geni tur ngajak tiang sami ngangetang raga krana angine dingin lan sampun ngawitin sabeh.
3 Ritatkala dane Paulus munduhang carang-carang kayu saha kagenahang ring genine,
jeg saget wenten lelipi sane madue wisia wetu saking carang-carang kayune krana panes genine punika.
Raris lelipine punika nyotot tangan dane Pauluse.
4 Ritatkala wargane irika nyingakin lelipine punika nglanting ring tangan dane Pauluse,
ipun sami saling mabaos sapuniki,
“Pastika anake punika sampun ngamademang anak.
Yadiastun ipun slamet saking baya ring segarane,
Dewi Keadilan nenten manggiang ipun maurip.”
5 Nanging dane Paulus ngampigang lelipine punika ka genine tur dane nenten mataenang napi-napi.
6 Wargane irika ngaden tangan dane Pauluse jagi beseh utawi dane pramangkin ebah tur padem.
Nanging sasampune sada sue nyantosang,
wargane nyingakin dane nenten mataenang napi-napi.
Irika raris wargane mabalik ngaden dane punika dewa.
7 Kaceritayang,
nenten adoh saking genahe punika,
wenten tanah lan umah druen gubernure ring pulone punika.
Gubernure punika mapesengan Publius.
Gubernur Publius nyambut tiang sami dados tamiu antuk manah sane becik kantos tigang dina suene.
8 Duk punika ajin gubernure punika sedek sungkan panes lan disentri.
Dane Paulus raris ngranjing ring kamar ajin gubernure punika.
Irika dane ngenahang tangan ring duur ajin gubernure saha nunas icayang ipun.
Sekadi punika dane Paulus nyegerin ipun.
9 Krana paindikane punika,
makasami anake sane sungkan ring pulone punika rauh ring dane Paulus,
tur sami kasegerin.
10-11 Wargane irika ngajiang tiang sami saha ngicen adiah sane akeh.
Dane Paulus Luas ka Kota Roma
Sasampune telung bulan, ritatkala tiang sami jagi malayar, wargane irika ngicen sekancan kaperluan tiange sami buat pamargin tiange. Raris tiang sami menek kapal tur luas saking pulone punika. Kapale punika rauh saking Kota Aleksandria, raris karerenang ring Pulo Malta tatkala masan dingin. Kapale punika madaging lambang Dewa Kembar, inggih punika Dewa Kastor lan Dewa Poluks.
12 Raris tiang sami singgah ring pelabuhan Sirakusa tur meneng irika tigang dina suene.
13 Saking irika tiang sami nglanturang malayar raris rauh ring Kota Regium.
Benjangane wenten angin rauh saking kelod ngampehang kapale kantos malih puane tiang rauh ring Kota Putioli.
14 Irika tiang sami kacunduk sareng makudang pengiring Sang Hyang Yesuse.
Tur ipun sami nunas mangda tiang meneng irika pitung dina suene.
Wusan punika tiang sami raris nglanturang mamargi nuju Kota Roma.
15 Para pengiring Sang Hyang Yesuse ring Kota Roma mirengin orti indik tiang sami.
Punika mawinan ipun sami mapagin tiang ring Kota Pasar Apius lan Kota Penginepan Tiga.
Ritatkala dane Paulus nyingak ipun sami,
dane raris ngaturang penyuksma ring Sang Hyang Pengardi tur manah danene dados kukuh.
16 Ritatkala rauh ring Kota Roma,
dane Paulus kicen meneng ring umah sane sewa dane nanging tetep kajaga olih tentara adiri.
Dane Paulus ring Kota Roma
17 Sasampune tigang dina,
dane Paulus ngamanggil para pemimpin Yahudine sane wenten irika.
Sasampune sami pada rauh,
dane Paulus raris matur ring ipun sami sapuniki,
“Duh para semeton!
Titiang nenten malaksana iwang ring bangsan iragane wiadin awig-awig sane tampi iraga saking para leluhur iragane sami.
Yadiastun sekadi punika,
titiang tetep kaejuk ring Kota Yerusalem tur kaserahang ring para anak Romane.
18 Sasampune prakaran titiange kapreksa,
raris para penguasa Romane irika meled mebasang titiang krana nenten ja wenten kaiwangan titiange kantos titiang pantes kaukum padem.
19 Nanging krana anak Yahudine irika nungkasin indik titiang kabebasang olih para penguasa Romane,
punika mawinan titiang musti nunas mangda prakaran titiange kaadilin olih kaisar Romane.
Nanging tatujon titiange nenten ja nuduh bangsan titiange praragan.
20 Nah punika mawinan titiang nunas mangda matemu sareng semeton sami jagi mabligbagan.
Sane mangkin,
titiang kategul nganggen rante ulian titiang pracaya kapining Sang Prabune sane kajantosang olih Bangsa Israel.”
21 Raris para pemimpin Yahudine mabaos kapining dane Paulus sapuniki,
“Tiang sami nenten ja nerima surat saking Propinsi Yudea indik ragane.
Turmaning nenten wenten saking semeton iragane rauh mriki ngortiang indik ragane utawi nyeritayang paindikan jele indik ragane.
22 Nanging tiang sami meled mirengin indik kapracayaan ragane krana tiang sami sampun mirengin indik anake nganistayang pengajahan sane pracayain ragane punika.”
23 Irika raris para pemimpin Yahudine mastiang galah ipun sami jagi matemu malih sareng dane Paulus.
Duk galah sane sampun kapastiang punika,
akeh pisan anake rauh ring genah dane Pauluse meneng.
Semengan kantos sore,
dane Paulus nerangang tur ngortiang ring anake irika indik Sang Hyang Pengardi mamrentah dados Raja.
Dane Paulus ngutsahayang mangda muktiang Sang Hyang Yesus nenten tios Sang Prabu sane Kajanjiang olih Sang Hyang Pengardi nganggen daging Cakepan Sucine,
inggih punika napi sane katulis olih dane Musa lan olih para sinoman Sang Hyang Pengardine.
24 Saking anake akeh punika,
wenten sane dados pracaya kapining baos dane Pauluse nanging wenten pada sane nenten pracaya.
25 Ipun sami saling matungkasan.
Nanging sadereng ipun sami matilar saking genahe punika,
dane Paulus mabaos sapuniki,
“Yakti pisan manut sabdan Roh Sang Hyang Pengardine kapining para leluhur iragane sekadi sane katulis ring cakepan Sinoman Yesaya,
sapuniki,
26 ‘Kemu ja sid bangsane ento tur orahang kene,
“Kita bakal sesai ningeh sakewala tusing ja bakal ngerti;
Kita bakal sesai ningalin sakewala tusing ja nawang.”
27 Krana papineh bangsane ene suba bengkung,
kupingne suba bongol,
lan matane ngidem.
Ia malaksana buka keto apanga
matane tusing ningalin,
kupingne tusing ningeh,
kenehne tusing ngresep,
apanga ia tusing mabalik kapining Nira
laut Nira nyegerin ia.’”
Yesaya 6:9-10.
28 Raris dane Paulus mabaos malih sapuniki,
“Duh para semeton,
semeton musti uning indik kaslametan saking Sang Hyang Pengardi sampun kaortiang ring anake sane nenten Yahudi.
Tur anake nenten Yahudi jagi nerima Orti Rahayune punika.”
29 [Sasampune dane Paulus mabaos sapunika,
anak Yahudine matilar saking genahe punika sambilanga saling matungkasan.]a
30 Kalih tiban suene dane Paulus meneng ring Kota Roma ring umahe sane sewa dane praragan.
Dane seneng nerima anake sami sane rauh ring dane.
31 Tur tanpa pialang,
dane wanen pisan ngortiang kapining anake akeh indik Sang Hyang Pengardi mamrentah dados Raja tur ngajahin indik Sang Hyang Yesus dados Sang Prabu sane Kajanjiang olih Sang Hyang Pengardi.